Spá 0,7 prósent hækkun neysluverð

Greiningardeild Glitnis spáir að vísitala neysluverðs muni hækka um 0,7% í janúar. Ef spáin gengur eftir mun ársverðbólga aukast úr 18,1% í 18,7%. ,,Eins og jafnan í janúar togast nú á áhrif af útsölum og verðskrárhækkanir, en til viðbótar eru áhrif af gengisfalli krónu á seinni hluta síðasta árs, sem enn er að ýta upp verðlagi á ýmsum neysluvörum," segir í Morgunkorni Glitnis.

Á heildina litið greiningardeildin þó ráð fyrir að verðlækkun á fötum og skóm vegi til 0,5% lækkunar á vísitölu neysluverð, auk þess sem útsölur draga úr hækkunartakti ýmissa annarra undirliða. Þá var komugjald vegna ýmiss konar heilbrigðisþjónustu hækkað töluvert um áramót, sem og verð á raforku, auk þess sem áhrif af hækkun áfengisgjalds og tóbaksgjalds í desember koma að verulegum hluta fram nú. Telur greiningardeildin að þessi hækkun á opinberum verðskrám og álögum hækki vísitölu neysluverðs um 0,4%.

,,Verðbólga er nú við hámark og teljum við að á næstu mánuðum muni draga verulega úr skriðþunga hennar. Frá og með febrúar taka einnig að heltast úr lestinni mánuðir mikillar verðbólgu þegar horft er til 12 mánaða hækkunartaktsins, og gerum við því ráð fyrir allhraðri hjöðnun 12 mánaða verðbólgu frá og með 2. fjórðungi ársins. Ef spá okkar gengur eftir verður verðbólga komin niður í 14% um mitt þetta ár og niður fyrir 5% í upphafi næsta árs," segir í Morgunkorninu. 

Á næsta ári telur greingardeildin útlit fyrir að verðbólga verði hófleg og sem fyrr telur hún talsverðar líkur á tímabili verðhjöðnunar einhvern tíma á næstu misserum.