Árvakur í söluferli

Árvakur hf., útgáfufélag Morgunblaðsins, hefur falið Fyrirtækjaráðgjöf Nýja Glitnis banka hf. að annast ráðgjöf og formlegt ferli sem lýtur að öflun hlutafjár fyrir félagið. Bankinn mun á næstu dögum auglýsa eftir tilboðum í nýtt hlutafé Árvakurs, sem gefið verður út eftir að núverandi eigendur færa niður eign sína í félaginu.

Þetta kemur fram í tilkynningu frá Nýja Glitni.

„Söluferlið verður opið öllum áhugasömum fjárfestum sem uppfylla skilyrði til þess að geta talist fagfjárfestar samkvæmt lögum nr. 108/2007 um verðbréfaviðskipti .

Áhugasamir fjárfestar þurfa að fylla út trúnaðaryfirlýsingu og skila henni til Fyrirtækjaráðgjafar Nýja Glitnis fyrir kl. 16:00, föstudaginn 30. janúar nk. Gögn verða afhent á tímabilinu 28.-30. janúar með rafrænum hætti á netfang sem fjárfestar tilgreina í trúnaðaryfirlýsingu.

Gert er ráð fyrir að óskuldbindandi tilboðum sé skilað til Nýja Glitnis miðvikudaginn 4. febrúar 2009. Þeim fjárfestum, sem leggja fram hæstu tilboðin, verður boðið til áframhaldandi þátttöku í söluferlinu og fá þá drög að kaupsamningi. Þá fá fjárfestar aðgang að nánari upplýsingum um starfsemi og fjárhag fyrirtækisins, en þeim ber svo að skila inn skuldbindandi tilboðum í síðasta lagi þriðjudaginn 17. febrúar.

,,Eins og fram hefur komið í fjölmiðlum hafa nokkrir aðilar sýnt félaginu mikinn áhuga. Með þessu eru Árvakur og Nýi Glitnir að setja málið í ferli þar sem allir sitja við sama borð. Vonir standa til þess að öflugir aðilar, sem geta styrkt stöðu Árvakurs til framtíðar, komi að félaginu," segir Einar Örn Ólafsson, forstöðumaður Fyrirtækjaráðgjafar Nýja Glitnis.