Vilja flytja Straum-Burðarás til Lundúna eða Stokkhólms

Stjórnendur Straums-Burðaráss íhuga að skrá bankann í kauphöllina Lundúnum og færa jafnframt lögheimili bankans þangað. Þetta hefur breska blaðið Financial Times eftir William Fall, forstjóra fyrirtækisins. Hann segir að auðveldasta leiðin fyrir bankann til þess að ná fram áætlunum sínum sé í samstarfi við breskan aðila. Hann segir jafnframt koma til greina að skrá fyrirtækið í Svíþjóð ef heppilegri samstarfsaðili finnst þar.

„Við horfum hýru auga til Stokkhólms og Lundúna þar sem stofnanir eru traustar og reglugerðaumhverfið gott," segir Fall í samtali við blaðið. „Hlutabréf okkar eru ekki að seljast á eðlilegu verði og það er ekkert fjármagnsflæði á Íslandi," segir hann jafnframt.

Financial Times segir að með því að flytja Straum úr landi yrði áhersla fyrirtækisins á alþjóðamarkað augljósari. Jafnframt yrði það til þess að bankinn yrði fjarlægari fjármálakreppunni á Íslandi sem leiddi til þess að þrír stærstu bankarnir voru þjóðnýttir í haust.

Björgólfur Thor Björgólfsson, stjórnarformaður Straums og stærsti hluthafinn, segir við blaðið að það hafi lengi verið ætlunin að flytja bankann frá Íslandi og gera hann að alþjóðlegum banka.