Gjaldeyrishöftum mögulega aflétt með nýjum seðlabankastjóra

Beat Siegenthaler sérfræðingur TD Securities í nýmörkuðum segir í fréttabréfi sínu að gjaldeyrishöftunum hér á landi verði mögulega létt að einhverju marki með tilkomu nýs seðlabankastjóra.

Eins og kunnugt er af fréttum hefur Jóhanna Sigurðardóttir tilvonandi forsætisráðherra landsins sagt að eitt af fyrstu verkum nýrrar ríkisstjórnar verði að víkja núverandi bankastjórn Seðlabankans frá störfum.

Siegenthaler telur að fyrsta endurskoðun Alþjóðagjaldeyrissjóðsins (AGS) á áætlun hans fyrir Ísland í lok febrúar gæti verið tækifærið til að tilkynna um létt verði á gjaldeyrishöftunum. „Það er víðtæk skoðun á Íslandi að núverandi kringumstæður gangi ekki til lengri tíma og að fjármálamarkaðir landsins sem og efnahagslíf komast ekki í eðlilegt horf fyrr en létt er á gjaldeyrishöftunum," segir Siegenthaler.

Fram kemur í máli Siegenthaler að mögulega muni nýr bankastjóri Seðlabankans vilja bíða með að aflétta gjaldeyrishöftunum þar til að ný ríkisstjórn hefur tekið við völdum eftir kosningarnar í vor. „Hinsvegar teljum við að AGS muni við endurskoðun sína leggja fram áætlun um hvernig létta á gjaldeyrishöftunum," segir hann.

Að lokum segir Siegenthaler að það fari eftir því hve traust efnahagsstefnan verður hve fljótt verði hægt að setja krónuna að fullu á flot aftur og hún nái stöðugleiki í kringum 146 kr. fyrir evruna eða minna.