Heildarskuldir ríkissjóðs komnar í 92% af landsframleiðslu

Heildarskuldir ríkissjóðs námu 1.403 milljörðum króna í lok annars ársfjórðungs eða sem nam 92% af áætlaðri landsframleiðslu ársins. Til samanburðar nam skuld ríkissjóðs 573 milljörðum króna á 2. ársfjórðungi 2008 eða sem svarar 39% af landsframleiðslu.

Hrein peningaleg eign ríkissjóðs, þ.e. peningalegar eignir umfram skuldir, var neikvæð um 412 milljarða króna í lok 2. ársfjórðungs 2009 samanborið við 37 milljarða króna jákvæða eign á sama ársfjórðungi 2008.

Þetta kemur fram á vefsíðu Hagstofunnar. Á sama ársfjórðungi 2008 mældist tekjuhallinn 0% af landsframleiðslu og 0,4% af tekjum hins opinbera. Þennan mikla viðsnúning í fjármálum hins opinbera má rekja bæði til mikils tekjusamdráttar og mikillar útgjaldaaukningar.

Hið opinbera var rekið með 45 milljarða króna tekjuhalla á 2. ársfjórðungi 2009 samanborið við 0,6 milljarða króna tekjuhalla á sama tíma 2008. Sem hlutfall af landsframleiðslu ársfjórðungsins mældist tekjuhallinn 12% og sem hlutfall af tekjum hins opinbera um 30%.

Heildartekjur hins opinbera námu 150 milljörðum króna á 2. ársfjórðungi 2009 samanborið við 163 milljarða króna á sama tíma 2008 og lækkuðu um 7,7% milli ára. Tekjulækkunin skýrist fyrst og fremst af 6,7 milljarða króna minni tekjum af vöru- og þjónustusköttum milli ára og um 5 milljarða króna minni tekjum af tekjusköttum.

Á sama tíma jukust heildarútgjöld hins opinbera um 19% milli ársfjórðunganna eða úr ríflega 163 milljörðum króna 2008 í 195 milljarða króna 2009. Sú mikla útgjaldahækkun skýrist að mestu af 10 milljarða króna aukningu í félagslegum tilfærslum til heimilanna, 10 milljarða króna hækkun í vaxtakostnaði hins opinbera og ríflega 9 milljarða króna vexti í kaupum hins opinbera á vöru og þjónustu.