Eignir Kaupþings hafa hingað til skilað 10 milljörðum kr. í sölu

Samanlagt bókfært virði eigna sem seldar hafa verið af skilanefnd Kaupþings í frjálsri sölu af bankanum og útibúum hans nemur minna en 65 milljónum evra eða tæpum 10 milljörðum kr..

Að auki hafa ákveðnar eignir verið seldar án vilja bankans til þess að standa straum af endurgreiðslu innlána en þau eru forgangskröfur.

Skilanefnd og aðstoðarmaður í greiðslustöðvun hafa fyrir hönd bankans ákveðið að biðja um níu mánaða framlengingu greiðslustöðvunar.

Þetta kemur fram í skýrslu sem unnin hefur verið fyrir kröfuhafa Kaupþings. Skýrslan er unnin af Ólafi Garðarssyni hrl og meðeiganda að Lögfræðistofu Reykjavíkur, sem hefur verið skipaður aðstoðarmaður bankans við greiðslustöðvun.

Í skýrslunni er fjallað um stöðu Kaupþings, framtíðarhorfur og aðra kosti í stöðunni en áframhaldandi greiðslustöðvun. Fram kemur að ekki verði séð annað í stöðunni en að tveir raunhæfir kostir til staðar, gjaldþrot eða áframhaldandi greiðslustöðvun með það að markmiði að hámarka virði eigna bankans, kröfuhöfum til hagsbóta.

Í þinghaldi þann 13. febrúar 2009 mun Héraðsdómur Reykjavíkur úrskurða hvort heimild verði veitt til áframhaldandi greiðslustöðvunar.

„Það er skoðun aðstoðarmanns við greiðslustöðvun og skilanefndar að hagsmunum kröfuhafa sé best borgið með því að lögð sé fram beiðni um framlengingu greiðslustöðvunar. Skilanefnd og aðstoðarmaður í greiðslustöðvun hafa því fyrir hönd bankans ákveðið að biðja um níu mánaða framlengingu greiðslustöðvunar," segir í skýrslunni.