Krónubréf upp á 98 milljarða á gjalddaga fyrir lok febrúar

Krónubréf að upphæð 98 milljarðar kr. eru á gjalddaga fyrir lok febrúar. Stærsti einstaki gjalddaginn er 28. janúar þegar 40 milljarðar kr. eiga að greiðast en útgefandinn að þeim bréfum er Rabobank í Hollandi.

Alls eru 238 milljarðar kr. í krónubréfum nú útistandandi samkvæmt nýjum tölum Seðlabankans. Rabobank er stærsti útgefandinn að þessum bréfum með 78 milljarða kr. af heildarupphæðinni eða 33%. Stærsti gjalddaginn í febrúar er einnig á vegum Rabobank en þann 17. febrúar koma 25 milljarðar kr. á gjalddaga á vegum bankans.

Aðrir sem eru umfangsmiklir í krónubréfum eru þýski bankinn KfW sem hefur gefið út 42 milljarðar af þeim bréfum sem enn eru útistandandi, European Investment Bank hefur gefið út bréf fyrir 33 milljarða kr. og Ameríski þróunarbankinn hefur gefið út bréf fyrir 22 milljarða kr..

Eins og kunnugt er af fréttum geta handhafar bréfanna ekki fengið þau greidd út í gjaldeyri. Hinsvegar er hægt að fá vextina greidda út en áætla má að vaxtagreiðslunar af bréfunum sem koma á gjalddaga fyrir lok febrúar nemi hátt í 20 milljörðum kr.