Eyðsla ferðamanna hefur tvöfaldast í ár

Ferðamenn eyddu um 90 prósentum meira að meðal-tali á Íslandi frá janúar til júlí, en á sama tímabili í fyrra. Mest er aukningin hjá Dönum, um 150 prósent, og skipa þeir sér nú í efsta sæti listans sem Bandaríkjamenn hafa lengst af verið í.

„Mynstrið á ferðamönnum virðist vera að breytast. Áður var þetta mikið af fólki sem kom til að skoða náttúruna en nú virðast þeir vera tilbúnir að kaupa meira," segir Helgi Hrannarr Jónsson, framkvæmdastjóri Global Refund, sem sér um umsýslu fyrir Tax Free á Íslandi.

„Íslenskir verslunareigendur eiga hrós skilið fyrir að bjóða upp á öflugt vöruúrval þrátt fyrir stöðuna," segir Helgi.

Þótt aukning sé um 90 prósent má gera ráð fyrir að 30 til 40 prósent stafi af verðhækkunum, að sögn Helga. Sagt var frá því í Fréttablaðinu að aukning í ferðum frá Frakklandi er um 55 prósent hjá Icelandair. Helgi hefur svipaða sögu að segja.

„Ef horft er á Frakka, Þjóðverja, Ítali og Hollendinga er aukningin í eyðslu í kringum 110 til 125 prósent".

Lengst af hafa Bandaríkjamenn verið í fyrsta sæti yfir þá ferðamenn sem eyða mestu á Íslandi. Í fyrra komust Norðmenn í efsta sætið, en nú hafa danskir ferðamenn skotist upp á toppinn, að sögn Helga. Norðmenn eru næstflestir, með aukningu um rúmlega 100 prósent frá því í fyrra og Bandaríkjamenn eru í þriðja sæti með svipaða aukningu.

Aukningin hjá þjóðum á borð við Kanada, Kína og Rússlandi er minni, en Kandamenn hafa eytt 67 prósent meira í ár en í fyrra.

Meðaltals endurgreiðsla til ferðamanna í gegnum Tax Free hefur aukist um 20 prósent og er meðaltalsávísun nú 14.500 krónur, að sögn Helga. Þjóð sem sker sig úr eru til dæmis Rússar, þar sem meðaltalið er vel yfir 16 þúsund krónum. Bretar eru hins vegar með tæplega 12 þúsund krónur.

Þrátt fyrir þessa aukningu í sölutölum frá janúar til júlí fækkaði ferðamönnum um þrjú prósent á tímabilinu janúar til júní.

„Ég er viss um að við munum ná sama heildarfjölda á árinu og í fyrra því það kemur gríðarlegur fjöldi í júlí, ágúst og september," segir Helgi. vidir@frettabladid.is