Krónubréf seld utanmarkaðar á 220 krónur fyrir evruna

Nokkur viðskipti eru með krónubréf utanmarkaðar (offshore) í Evrópu og víðar og er gengið í þeim viðskiptum 220 kr. fyrir evruna. Skrá gengi evrunnar hérlendis í dag er hinsvegar 149 kr. á evruna.

Beat Siegenthaler forstöðumaður nýmarkaða hjá TD Securities í London segir í samtali við Fréttastofu að þetta séu ekki umfangsmikil viðskipti. "Við erum að tala um 10 milljónir hér og 50 milljónir þar," segir Siegenthaler.

Fram kemur í máli Siegenthaler að Seðlabanki Íslands viti af þessum viðskiptum en láti þau liggja milli hluta enda koma þau gjaldeyrishöftunum ekkert við. Þarna séu erlendir fjárfestar að versla sín í millum.

Siegenthaler hefur verið umsvifamikill miðlari á krónubréfum þeim sem enn eru frosin inni á Íslandi í kjölfar gjaldeyrishaftanna. Hann segir að þeir fjárfestar sem liggi með krónubréf hafi skilning á ástandinu og séu að leita leiða til að koma bréfunum í verð.

Það sem stjórnvöld á Íslandi og Seðlabankinn vill helst er að krónubréfunum sé skipt út fyrir ríkisbréf. Siegnthaler segir að það hafi gerst í nokkrum mæli. "Þetta er eina raunhæfa leiðin í augnablikinu. Menn vilja ekki setja þessa peninga inn á reikninga í íslensku bönkunum því þeim finnst það óþægilegt," segir Beat Siegenthaler.