Ekkert ákveðið um yfirtöku á erlendum íbúðalánum

Engar ákvarðanir hafa verið teknar um yfirtöku Íbúðalánsjóðs á erlendum íbúðalánum á því gengi sem var í gildi þegar lánin voru tekin. Fréttir þessa efnis hafa vakið upp hörð viðbrögð meðal almennings.

Innan viðskipta- og félagsmálaráðuneytisins eru nú ræddar hugmyndir hvernig bregðast megi við vanda heimilanna vegna hækkandi íbúðalána.

Samkvæmt Morgunblaðinu í dag kemur meðal annars til greina að veita íbúðalánsjóði heimild til að yfirtaka myntkörfulán á svipuðu gengi og var þegar þau voru tekin. Þetta myndi hafa veruleg áhrif á skuldastöðu þeirra heimila sem tóku myntkörfulán á sínum tíma.

Fjölmargir hafa haft samband við fréttastofu í dag og lýst yfir óánægju sinni með þessa hugmynd. Telur fólk að þarna sé verið að hygla ákveðnum hópi en á sama tíma sé lítið gert fyrir þá sem skulda verðtryggð lán í íslenskum krónum. Íbúðalánasjóður hefur nú heimild til að yfirtaka myntkörfulán á gengi dagsins.

Þegar bankarnir hrundu námu gengistryggð íbúðlán heimilanna tæpum 110 milljörðum króna. Komi þessi hugmynd til framkvæmda gæti kostnaður ríkisins því hlaupið á tugum milljarða króna.