Loftfimleikar yfir Vatnsleysuströnd

Fjölskyldudagur verður haldinn í Vogum á Vatnsleysuströnd á laugardaginn. Óhætt er að segja að dagskráin sé fjölbreytt en hún hefst með dorgveiðikeppni á smábátabryggjunni klukkan 9:30.

Verðlaun verða veitt fyrir stærsta fiskinn og þann furðulegasta. Síðan rekur hvað annað og eru margir atburðir sérsniðnir fyrir fjölskyldur eins og ratleikur, kassabílarallí vatnsbyssustríð, og sápufótbolti.

Það verða sölutjöld og grill. Skemmtikraftar munu troða upp, meðal annars Hara systur ásamt Pínu pokastelpu.

Aragerði verður vígt eftir breytingarnar, umhverfisverðlaun verða veitt og Björn Thoroddsen listflugmaður mun leika sér í háloftunum.

Hin sögufræga flugvél Þristurinn mun renna sér í lágflugi yfir bæinn. Bæjarbúar munu náttúrlega fjölmenna en gestir eru einnig velkomnir.