Vegagerðarmenn áttu fótum sínum fjör að launa

Fjórir vegagerðarmenn, sem voru að laga vegaskemmdir á Óshlíðarvegi á tíunda tímanum í morgun, eftir mikið grjóthrun þar í nótt, áttu fótum sínum fjör að launa þegar grjót tók að hrynja á ný.

Upphaflega hrundi gjór á 250 metra kafla á Óshlíðarvegi i nótt þannig að hann lokaðist. Svo vel vildi til að engin var þar á ferð þegar hrunið varð. Þetta er eitthvert mesta grjóthrun á veginn í mörg ár. Steinar upp á eitt til þrjú tonn dreifðust um allan veg og var sá stærsti 10 ti l12 tonn. Heildarmagnið nemur mörg hundruð tonnum, að mati Vegagerðarinnar.

Vegfarandi, sem sá hvernig komið var, lét lögreglu vita, sem kallaði út vegagerðarmenn. Þeir voru fljótir að opna veginn á ný með stórvirkum vinnuvélum.

En á tíunda tímanum í morgun, þegar fjórir starfsmenn Vegagerðarinnar voru fótgangandi að fylla í smá holur í veginum, eftir hrunið í nótt, fór aftur að hrynja, en þó margfalt minna en í nótt. Miklar skemmdir urðu á varnargirðingum ofan við veginn í nótt og ljósastaur brotnaði. Fyrir liggur að ráðast í kostnaðarsamar viðgerðir á girðingunum, því Óshlíðargöng verða ekki tilbúin fyrr en eftir rúmt ár.