Fékk ekki barnapössun og kemst ekki á átakafund

„Kæru félagar, Vegna þess hve fyrirfarinn var stuttur sé ég mér ekki fært á að mæta í kvöld en ég hef ekki aðgang að pössun í kvöld og vil helst ekki taka son minn með á átakafund."

Þetta skrifaði Birgitta Jónsdóttir, þingkona Borgarahreyfingarinnar í athugasemd við fundarboð varðandi félagsfund Borgarahreyfingarinnar sem verður í kvöld. Fundurinn hófst klukkan átta.

Birgitta skrifar áfram:

„Ég hef sagt það opinberlega og segi það líka við ykkur að mér finnst best að ræða við fólk án milliliða og mér finnst ótækt að fjalla um málefni Þráins án þess að hann sé á staðnum til að svara fyrir sig. Við lögðum til vegna þess að öll okkar athygli er á Icesave (Þór er til að mynda að fara á fund þar af lútandi í kvöld með sinni nefnd) að fundi yrði frestað um viku - þá væri búið að taka Icesave út úr nefnd og við hefðum betri tök á að sinna þessu málefni."

Fundurinn er tilkominn vegna atkvæðagreiðslu um ESB á þingi þann 16 júlí síðastliðinn. Þá kusu Birgitta auk Þórs Saari og Margrétar Tryggvadóttur, gegn ESB aðildarumsókninni. Þá höfðu þau gert heiðurssamkomulag við Samfylkinguna um að greiða atkvæði með tillögunni.

Þráinn Bertelsson kaus með málinu og gagnrýndi samflokksmenn sína harkalega í kjölfarið. Sú gagnrýni náði hámarki í Fréttablaðinu í dag.

En Birgitta þykir málið ekki ýkja mikilvægt miðað við þau risamál sem eru í gangi í þjóðfélaginu og skrifar að lokum:

„Mér finnst ástæðulaust að vera að gera úlfalda úr mýflugu - en það er einmitt það sem þetta vandamál er miðað við Icesave. Ég hlakka svo til að hitta ykkur að viku liðinni. Með björtum kveðjum, Birgitta"