Verð á bensíni hjá ÓB dýrara en hjá Olís

Algengasta sjálfsafgreiðsluverð á lítranum af bensíni hjá ÓB á höfuðborgarsvæðinu, sem er í eigu Olís, er hærra en verð á bensíni hjá Olís í Mjódd.

Á flestum sjálfsafgreiðslustöðvum ÓB á höfuðborgarsvæðinu er verðið á bensínlítranum 190,3 krónur en á Olís bensínstöðinni í Mjódd er verðið 190,1 króna.

ÓB býður að jafnaði ódýrara eldsneytisverð en bensínstöðvar Olís og kemur því töluvert á óvart að verð á bensíni hjá ÓB sé 20 aurum dýrara en á Olís bensínstöðinni í Mjódd.

Samúel Guðmundsson, framkvæmdastjóri vörustýringarsviðs Olís, segir í viðtali við Vísi að öllu jöfnu sé eldsneytisverð hjá ÓB stöðvunum ódýrara en hjá Olís og einungis sé um tímabundna lækkun að ræða í Mjóddinni. Hann segir ennfremur að verð á eldsneyti hjá ÓB sé vanalega 1,6-2 krónum ódýrara en hjá Olís.

Á heimasíðu ÓB kemur fram að markmið ÓB sé að fjölga valkostum í eldsneytissölu á Íslandi en jafnframt að koma til móts við óskir viðskiptavina sem gjarnan vilja dæla sjálfir gegn lægra verði.