Dorrit vill breyta Íslandi í svala útgáfu af Dubai

Forsetafrúin Dorrit Moussaieff hefur ákveðnar hugmyndir um hvernig best sé fyrir Ísland að vinna sig út úr kreppunni. Dorrit vill breyta Íslandi í svala (cool) útgáfu af Dubai.

Forsetafrúin viðrar þessar skoðanir sínar í viðtali við breska blaðið The Times nú um helgina. Hún segir að hún vilji þróa áfram ýmsa toppþjónustu sem þegar er til staðar á Íslandi. Í þvi sambandi nefnir hún t.d. ferðamannaþjónustu, Omega3 pillur, erfðarannsóknir og Latabæ.

Á Dorrit er að skilja að í hinni svölu útgáfu Íslands af Dubai yrði lögð áhersla á hollt fæði og heilsulindir í staðinn fyrir sól og sand.

Þá vonar Dorrit að hún geti breytt Íslandi í friðarhöfn fyrir listunnendur á þann hátt að hér verði settar á fót geymslur fyrir listaverkasöfn í einkaeigu.

Fram kemur í viðtalinu að hún hafi þegar rætt við vinkonu sína, listunnendan og Íslandsvininn Francescu von Habsburg um málið en nóg sé af plássi fyrir slík listaverkasöfn í yfirgefnum skemmum NATO á Keflavíkurflugvelli.

Dorrit segir að Ísland sé í aðeins 3,5 tíma flugferð frá Evrópu og 4,5 tíma frá Bandaríkjunum. Í báðum þessum heimsálfum sé fólk sem borgi mikið fé fyrir að geyma listaverkasöfn sín í Englandi og í Sviss.