Áform um að létta gjaldeyrishömlum í fyrstu endurskoðun AGS

Heildarmat á skilvirkni hamlanna á gjaldeyrismarkaði og áform um að aflétta þeim smám saman verður hluti af fyrstu endurskoðun efnahagsáætlunar stjórnvalda sem unnin er í samstarfi við Alþjóðagjaldeyrissjóðinn (AGS) núna í febrúar.

Greining Glitnis fjallar um málið í Morgunkorni sínu. Þar segir að slík tímaáætlun um afnám haftanna mun ráðast af því hvernig til tekst með framkvæmd skilyrða sem áður hafa verið skilgreind, svo sem með stöðugleika gengisins, horfur á greiðslujöfnuði og stöðu gjaldeyrisforðans. Kemur þetta fram í áfangaskýrslu AGS um stöðu efnahagsáætlunarinnar. Skýrslan var samin í kjölfar heimsóknar sendinefndar sjóðsins daganna 15.-19. desember síðastliðinn og birt í gær.

Ljóst er að afnám haftanna er ein af forsendum fyrir lækkun stýrivaxta. Í ofangreindri skýrslu segir AGS að stjórnvöld og fulltrúar sjóðsins séu sammála um að of snemmt sé að huga að lækkun. Þótt gengið sé orðið stöðugt geta hlutir auðveldlega snúist til verri vegar. Enn á eftir að draga úr verðbólguþrýstingi og ekki hefur enn verið gerð áætlun um að leggja niður hömlur á fjármagnsflutningum milli landa.

Kemur það fram í skýrslu AGS að sjóðurinn telur líklegt að kostnaður ríkissjóðs af hruni bankanna í október verði lægri en sjóðurinn taldi í upphafi. Reiknaði sjóðurinn með því að kostnaðurinn færi upp í 83% af landsframleiðslu brúttó og 55% af landsframleiðslu nettó. Var í þessari áætlun gert ráð fyrir því að kostnaður vegna erlendra innlánstrygginga yrði 47% af landsframleiðslu en að nettókostnaður þess yrði um 19% af landsframleiðslu.

Nú segir sjóðurinn að tryggð innlán í útibúum bankanna í Bretlandi, Hollandi og Þýskalandi eru talin nema 5,8 milljörðum dollara, eða rúmlega 600 milljörðum kr. en í upphafi hafi sjóðurinn áætlað að þetta yrði 8,2 milljarðar dollara. Að hluta stafar þetta af því að tekist hefur að aðskilja útibú í öðrum löndum og greiða innlán með endurheimtum eignum.

Þetta lækkar ofangreint heildarmat á kostnaði ríkissjóðs af hruni bankanna úr 83% af landsframleiðslu brúttó niður í 69%. Nettó fer matið þá niður í 41%.