Fjórir fá að bjóða í Árvakur

Fjórum fjárfestum hefur verið boðið að leggja fram skuldbindandi tilboð í Árvakur, útgáfufélag Morgunblaðsins, en tilboðin eiga að berast í síðasta lagi 17. febrúar næstkomandi. Í tilkynningu frá Glitni segir að söluferlið sé á áætlun og gert sé ráð fyrir að því ljúki þann 19. febrúar næstkomandi.

Frestur til að skila inn óskuldbindandi tilboð í Árvakur rann út í dag. Fimm fjárfestar uppfylltu skilyrði opins söluferlis Fyrirtækjaráðgjafar Nýja Glitnis hf. á hlutafé í Árvakri. Söluferlið var opið öllum fjárfestum sem uppfylla skilyrði laga um fagfjárfesta.

Á meðal þeirra fjögurra sem fá að gera skuldbindandi tilboð er hópur sem kallar sig Almenningshlutafélag um Morgunblaðið. Andrés Jónsson, einn af þeim sem stendur að hópnum, segir að málið hafi verið nokkuð langsótt fyrir hópinn en nú virðist sem tilboðið geti orðð að veruleika.