Komu íslensku fjármálalífi í mikla hættu og hreinar ógöngur

Ljóst var orðið í febrúar á síðasta ári að íslensku bankarnir, og þá einkum Kaupþing og Glitnir, voru búnir að koma íslensku fjármálalífi í mikla hættu og hreinar ógöngur með ábyrgðalausri framgöngu á undanförnum árum.

Þetta segir í lokaorðum skýrslu sem gerð var af hálfu Seðlabankans eftir margumrædda för Seðlabankamanna til London í febrúar þar sem fundað var með fulltrúum erlendra banka og matsfyrirtækja. Fyrir utan fyrrgreindra banka höfðu menn einnig áhyggjur af Icesave reikningum Landsbankans því þeir væru háðir því að traust ríkti áfram á íslenska bankakerfinu.

Jafnframt segir að hættulegt sé að hafast ekkert að í þeirri von að markaðir opnist óvænt og allur vandi verði á úr sögunni. Fram kemur í skýrslunni að erlendu sérfræðingarnir tölu að lánamarkaðurinn yrði lokaður fyrir íslensku bankanna í a.m.k. 12 mánuði og hugsanlega allt að 24 mánuði.

„Nauðsynlegt er að hefjast þegar handa við að vinda ofan af stöðunni svo hún verði ekki óleysanleg." segir í skýrslunni.

Seðlabankinn hefur margoft haldið því fram að þessi skýrsla hafi verið lesin upp fyrir ráðherra í ríkisstjórninni og efni hennar þeim því kunnugt.

Ráðherrarnir hafa hinsvegar greinilega ekki tekið neitt mark á þessari skýrslu því engar aðgerðir urðu af hálfu stjórnvalda til að „vinda ofan af stöðunni." Hinsvegar fóru Geir H. Haarde forsætisráðherra og Ingibjörg Sólrún Gísladóttir í einhverskonar almannatengslaferðir bæði vestur og austur um haf í mars á síðasta ári til að telja mönnum trú um að allt væri í lagi hérlendis.

Og varla hefur Seðlabankinn sjálfur tekið mikið mark á þessu plaggi sínu því mánuði eftir þessa fundi í London ákvað bankinn að afnema bindiskyldu á erlendum dótturfélögum bankanna. Afleiðingin varð að Icesave gat flætt út úr Bretlandi og yfir í mörg önnur lönd eins og t.d. Holland.