Rannsaka hvort bankarnir hafi tekið stöðu gegn krónunni

Það er verkefni fyrir hinn sérstaka saksóknara að kanna hvort að bankarnir hafi verið að veikja krónuna á sama tíma og þeir seldu okkur það sem við töldum vera gengisvarnir, segir framkvæmdastjóri LÍU.

Þetta kemur fram í Fréttablaðinu í dag. Eiríkur Tómasson, varaformaður Landssambands íslenskra útvegsmanna, telur ástæðu til að rannsóknarnefndin athugi gjaldmiðlasamningana sérstaklega. Hann segir marga telja að eigendur bankanna hafi látið selja útflutningsfyrirtækjum og lífeyrissjóðum samninga sem gerðu ráð fyrir að gengi krónunnar styktist. Það þýðir að gerður er samningur um gjaldeyri, þannig að hann sé seldur á tilteknum degi með loforði um að hann verði keypti aftur á tilteknu gengi síðar.

Friðrik J. Arngrímsson, framkvæmdastjóri LÍÚ, gengur lengra og segir að í tilviki bankanna sjálfra sé það verkefni fyrir hinn sérstaka saksóknara að kanna hvort bankarnir hafi verið að veikja krónuna á sama tíma og þeir hafi selt þeim það sem þeir hafi talir vera gengisvarnir. Stærstu eigendur Kaupþings, Kjalar og Exista, hefðu gert hið gagnstæða. Hann spyr einnig hvort að einu eignir bankanna séu stöður þeirra gegn krónunni og þar með gegn þjóðinni? Þess ber hinsvegar að geta að helstu eigendur bankanna áttu einnig hluti í sjávarútvegsfyrirtækjum, t.a.m. á Kjalar HB Granda.

Gengi krónunnar féll verulega allt árið í fyrra og í kjölfarið jukust erlendar skuldir heimila og fyrirtækja mikið. Davíð Oddsson, seðlabankastjóri, sagði um gengisfallið í lok mars á síðasta ári að óprúttnir aðilar hefðu gert atlögu að íslensku fjármálakerfi og Fjármálaeftirlitið hóf rannsókn sem lítið hefur frést af. Síðar nafngreindi Sigurður Einarsson, fyrrverandi stjórnarformaður Kaupþings, 4 vogunarsjóði sem áttu þátt í gengisfallinu.