Brotist inn í fjögur hús í Reykjavík

Brotist var inn í fjögur hús í Reykjavík í nótt. Eitt þeirra var við Keilufell í Breiðholti. Þar vöknuðu húsráðendur við þrusk um sexleytið í morgun. Þegar fólkið gáði að hvað um var að vera sá það að búið var að róta í öllu þeirra dóti og tveir bíllyklar höfðu verið teknir.

Bílarnir sem höfðu staðið í heimreiðinni voru farnir. Annar bílinn fannst í Ártúnsholti og var ökumaður hans handtekinn. Hinn bíllinn fannst kyrrstæður um svipað leyti.

Þá var brotist inn í Birkigrund í Kópavogi. Húsráðendur uppgötvuðu innbrotið þegar þeir komu heim um tvöleytið í nótt. Búið var að róta miklu til í íbúðinni og hafði fartölva verið tekin.

Þá var brotist inn í kjallara í Efstasundi. Innbrotið þar uppgötvaðist rétt eftir miðnætti, Canon myndavél, DVD-diskum, áfengi og Cintamani úlpu var stolið úr íbúðinni.

Einnig var brotist inn í kjallaraíbúð ofarlega á Laugavegi. Innbrotið uppgötvaðist um sexleytið í morgun, en ekki er ljóst hvort einhverju var stolið.