Smitsjúkdómadeild Landspítalans sett í sóttkví

Smitsjúkdómadeild Landspítalans í Fossvogi hefur verið sett í sóttkví eftir að vart varð við MÓSA bakteríu í tveim sjúklingum og einum starfsmanni.

Deildin er lokuð sem stendur og verður dauðhreinsuð, en það tekur að öllum líkindum nokkra daga.

MÓSA stendur fyrir meticillin ónæmur staphylococcus aureus, en það er baktería sem venjuleg sýklalyf duga ekki á.

„Þessi baktería er ónæm fyrir helstu sýklalyfjum og ef hún veldur sýkingu í til dæmis skurðsárum er fjandinn laus," segir Hugrún Ríkarðsdóttir, smitsjúkdómalæknir.

Á vísindavefnum segir að við sýkingu af völdum MÓSA þurfi að nota önnur sýklalyf en áður dugðu, sem oft hafi meiri aukaverkanir og séu miklu mun dýrari. Nái hún bólfestu á sjúkrahúsum geti reynst erfitt og kostnaðarsamt að uppræta hana.

Hugrún segir engan hafa sýkst á spítalanum ennþá og allt sé gert til að hún breiðist ekki út. Hugrún telur líklegast að hægt verði að hefta útbreiðsluna og bakterían muni ekki valda vandamálum.

„Við viljum ekki að þessi baktería nái fótfestu hér á landi," segir Hugrún.