Öll listaverk í eigu bankanna verði eign ríkisins

Búið er að leggja fram frumvarp á alþingi um að öll listaverk í eigu bankanna þriggja Landsbankans, Kaupþings og Glitnis verði hér eftir í eigu ríkisins. Sama gildi um listaverk í nýju bönkunum.

Flutningsmenn frumvarpsins eru Kristinn H. Gunnarsson, Ásta R. Jóhannesdóttir, Bjarni Harðarson. Þau vilja ennfremur að listaverkin skulu vera áfram almenningi til sýnis innan lands í viðskiptabönkunum eftir því sem unnt er.

Listasafn ríkisins fari með yfirumsjón verkanna í samráði við bankana, annast skráningu þeirra og efnir til kynningar á verkunum.

Í greinargerð með frumvarpinu segir: „Sú óvænta staða er upp komin í kjölfar bankakreppunnar að verðmæt listaverkasöfn viðskiptabankanna eru komin í eigu íslensku þjóðarinnar á nýjan leik. Frumvarp þetta er flutt til þess að tryggja að svo verði áfram og verða listaverkin eign ríkisins ef það nær fram að ganga....

Talið er að listaverkin séu alls um 4.000. Um 1.700 verk voru í eigu Landsbankans. Í safni Kaupþings voru um 1.200 verk og tæplega 1.100 í eigu Glitnis."