Defoe sagður fara til Tottenham í dag

Breska blaðið Daily Mail slær því upp á netsíðu sinni í dag að framherjinn Jermain Defoe muni ganga aftur í raðir Tottenham í dag fyrir 15 milljónir punda.

Defoe lék um árabil með Lundúnaliðinu en ákvað að ganga í raðir Portsmouth fyrir sléttu ári síðan. Það gerði hann fyrst og fremst til að fá að spila meira og til að leika undir stjórn Harry Redknapp sem hefur á honum miklar mætur.

Nú er Redknapp orðinn stjóri Tottenham og Portsmouth er talið tilbúið að skoða góð tilboð í alla sína bestu menn.

Daily Mail segir að þessar 15 milljónir punda séu enn hálfri milljón undir matsverði Portsmouth, en félagið myndi þó græða 5 milljónir á sölunni ef hún færi í gegn. Ekki er hægt að segja að það yrðu góð viðskipti af hálfu Tottenham, en ekki er alltaf spurt að því í bransanum.

Tottenham er orðað við fjölda leikmanna um þessar mundir og vitað er að félagið hefur mikinnn áhuga á bæði Craig Bellamy hjá West Ham og Steward Downing hjá Middlesbrough.

West Ham hefur þegar neitað tilboði Tottenham í Bellamy, en sagt er að Tottenham sé tilbúið að hækka tilboð sitt í velska landsliðsmanninn.

Breskir miðlar greina frá því í dag að Downing hafi farið fram á að verða seldur frá Boro, en forráðamenn félagsins gáfu það reyndar út í dag að hann væri ekki til sölu.