Kaupþing friðþægir fyrir stjórnvöld

Markmiðið með greiðsluaðlögunúrræði Kaupþings er að tryggja greiðsluvilja lántakenda og þar með rekstrargrundvöll bankans. Jafnvel virðist sem markmiðið sé einnig að fría stjórnvöld frá þeirri ábyrgð að tefla fram raunverulegum og sanngjörnum kerfisbundnum lausnum fyrir heimilin í landinu. Þannig skapi þetta úrræði ákveðna friðþægingu fyrir stjórnvöld. Þetta segir í greinargerð Hagsmunasamtaka heimilanna um nýtt úrræði sem Kaupþing kynnti fyrir fáeinum dögum.

Það var 24 júlí síðastliðinn sem Nýja Kaupþing kynnti nýja lausn fyrir þá viðskiptavini sem búa við skuld umfram greiðslugetu og markaðsvirði eignar. Úrræðið felur í sér að láni viðskiptavinar, að undangengnu greiðslumati, er breytt í nýtt verðtryggt langtímalán.

„Skuldaaðlögun Nýja Kaupþings virðist til þess fallin að fá fólk til að viðurkenna skuld sem það stofnaði ekki til, þ.e.a.s. stökkbreyttan höfuðstól gengis- og verðtryggðra lána sem hefur rokið upp úr öllu valdi á brostnum, ef ekki ólögmætum, forsendum. Samtökin líta svo á að þar sé um eignaupptöku að ræða sem stjórnvöldum beri að leiðrétta," segir í greinagerð frá Hagsmunasamtökum hemilanna.