Þvingunaraðgerðir ESB ræddar í utanríkismálanefnd

Alþjóðlegar þvingunaraðgerðir eru á dagskrá utanríkismálanefndar í dag. Það mun þó vera um praktíska umfjöllun að ræða, þ.e. hvernig þátttöku Íslands í slíkum aðgerðum verði háttað.

Nokkrar alþjóðlegar stofnanir geta tekið sig saman um þvingunaraðgerðir gegn einstökum ríkjum, til dæmis með viðskiptabanni, fjárfestingabanni, banni við vopnaviðskiptum og við ferðalögum einstaklinga.

Ísland er skyldugt til að taka þátt í aðgerðum öryggisráðs Sameinuðu þjóðanna svo dæmi sé nefnt, en getur valið hvort það tekur þátt í öðrum þvingunum, til dæmis með ESB ríkjunum.

Að sögn Grétu Gunnarsdóttur, sviðsstjóra hjá utanríkisráðuneytinu, verður einkum rætt á fundinum í dag hvernig samráði milli ráðuneytisins og utanríkismálanefndar verði háttað um þátttöku Íslands í þvingunaraðgerðum á vegum alþjóðastofnana, einkum ESB þar sem hún sé valkvæð.