Fengu framlengingu heimildar til greiðslustöðvunar

Héraðsdómur Reykjavíkur samþykkti í dag beiðni skilanefndar Kaupþings Banka hf. um framlengingu heimildar til greiðslustöðvunar til 13. nóvember 2009.

Þetta kemur fram í tilkynningu frá skilanefnd Kaupþings. Þar segir ennfremur að Ólafur Garðarsson hrl., aðstoðarmaður bankans á greiðslustöðvunartímabili hafi haldið kynningarfund fyrir lánardrottna þann 5. febrúar sl.

„Á fundinum var lögð fram skýrsla um framvindu mála frá því að bankinn leitaði til Fjármálaeftirlitsins þann 9.október 2008. Jafnframt voru þar kynntar fjárhagsupplýsingar sem og bráðabirgðamat á eignum bankans sem miðaðist við 15.nóvember 2008."

Í tilkynningunni segir einnig að eitt af meginverkefnum skilanefndar og starfsmanna hennar hafi verið að vernda eignir og verja hagsmuni lánardrottna eftir fremsta megni.

„Það er álit skilanefndar og aðstoðarmanns að framhald greiðslustöðvunar sé forsenda þess að unnt sé að sinna þeim verkefnum sem unnið er að innan bankans með það að markmiði að gæta hagsmuna kröfuhafa, hámarka endurgreiðsluhlutfall krafna og tryggja jafnræði á milli kröfuhafa."