Ekkert eins og áður var

„Það verður ekkert eins og var áður,“ segir Jóhann Antonsson, stjórnarformaður Sparisjóðs Svarfdæla á Dalvík og vísar þar til breytts rekstrarumhverfis fjármálafyrirtækja.

Smærri sparisjóðir eiga sumir hverjir í óformlegum þreifingum um samruna eða samstarf, en Jóhann telur þó lítinn fót fyrir fréttum af stofnun nýrrar norðlenskrar peningastofnunar.

„Sparisjóðsmenn um allt land velta hins vegar ýmsu fyrir sér í hagræðingarskyni þótt viðræður séu óformlegar,“ segir hann. „Allir leita hins vegar að hagkvæmustu leiðum. Það eina sem maður getur verið viss um er að ekkert verður eins og var áður. Ýmislegt þarf að breytast.“

Geirmundur Kristinsson, sparisjóðsstjóri Sparisjóðsins í Keflavík, telur sömuleiðis að við sparisjóðum landsins blasi gjörbreyttar aðstæður sem bregðast verði við. „Ég horfi fram á að á árinu verði samþjöppun meðal sparisjóða,“ segir hann.

Þorvaldur Lúðvík Sigurjónsson, forstjóri Saga Capital, kveður „úr lausu lofti gripnar“ þreifingarnar um norðlensku peningastofnunina sem vísað var til í kvöldfréttum Útvarps í vikunni. Banki hans átti þar að verða stærsti eigandi.

„Menn eru sjálfsagt að hittast hér og hvar í kaffi og kleinum, en við höfum ekki komið nálægt neinum viðræðum á þessum nótum.“ Við sameininguna voru orðaðir Sparisjóður Svarfdæla, Sparisjóður Ólafsfjarðar, Sparisjóður Siglufjarðar, Sparisjóður Skagafjarðar og Sparisjóður Höfðhverfinga á Grenivík, með mögulegri aðkomu KEA og Kaupfélags Skagfirðinga.

Saga Capital og VBS fjárfestingarbanki áttu í haust í viðræðum um mögulega sameiningu en þeim var slegið á frest í októberbyrjun vegna mikillar óvissu á fjármálamörkuðum. Þá hafði í fyrravor verið samið um aðkomu KEA að Sparisjóði Höfðhverfinga, en fallið var frá þeim ráðahag eftir að hann hafði um allnokkurt skeið verið til umfjöllunar hjá Fjármálaeftirlitinu. Þá hafði KEA einnig átt í viðræðum við Sparisjóð Svarfdæla um aðkomu að sjóðnum, en þeim hefur, samkvæmt heimildum blaðsins verið hætt, í minnsta kosti að sinni.

Samrunaviðræður Sparisjóðsins í Keflavík, Byrs sparisjóðs og SPRON munu vera á áætlun og ennþá að því stefnt að boða stofnfjáreigendur og hluthafa til fundar í febrúar þar sem fjallað verði um samruna sjóðanna. Formlegar sameiningarviðræður hófust í desemberbyrjun, en verði af sameiningunni miðar hún nýliðin áramót.