Seðlabankafrumvarp sætir harðri gagnrýni frá bankastjórum

Bankastjórar Seðlabankans, þeir Davíð Oddsson og Eiríkur Guðnason, hafa sett umsögn sína um Seðlabankafrumvarp ríkisstjórnarinnar á heimasíðu bankans. Þar kemur fram mjög hörð gagnrýni á frumvarpið. Bankastjórarnir sitja nú sem gestir á fundi viðskiptanefndar Alþingis þar sem farið er yfir frumvarpið.

Fram kemur í umsögn bankastjóranna að mjög virðist skorta á vandaðan rökstuðning í frumvarpinu og að litlar leiðbeiningar sé að finna í athugasemdum með því.

Hvað varðar hæfi seðlabankastjóra sem fjallað er um í þriðju grein frumvarpsins segja þeir Davíð og Eiríkur að að kröfurnar sem gerðar eru til seðlabankastjóra séu of þröngar og óljósar til að þær geti þjónað markmiðum um að tryggja farsæla yfirstjórn við þau verkefni sem bankanum eru falin að lögum.

Þá hafa þeir sitthvað að athuga við peningastefnunefnd þá sem frumvarpið gerir ráð fyrir að komið verði á fót. Gagnrýna þeir m.a. óljóst orðalag og að engin hæfisskilyrði séu sett nefndarmönnum.

Í lokin segja þeir Davíð og Eiríkur að að mjög mikilvægt sé að kasta ekki til höndunum við fyrirhugaðar breytingar á lögunum um Seðlabankann.

"Þar þarf að fara með mikilli gát og vandvirkni til þess að fyrirbyggja að úr verði stjórnsýslubastarður, sem geri stjórnin óskilvirka og valdi tortryggni innan sem utan bankans," segir í niðurlagi umsagnarinnar.