Skuldum Árvakurs við Landsbankann breytt í hlutafé

Til greina kemur að Nýi Landsbankinn breyti skuldum Árvakurs, útgáfufélags Morgunblaðsins, í hlutafé þegar að samið verður við nýja kaupendur á fyrirtækinu. Árvakur skuldar Nýja Landsbankanum 866 milljónir króna.

Í tilboðsgögnum, sem fréttastofa hefur undir höndum, kemur fram að Glitnir geri ráð fyrir að Nýi Landsbankinn sé reiðubúinn til þess að ganga frá skuld Árvakurs með því að breyta henni í hlutafé að nafnvirði 25 milljónir króna, sem er um það bil 10% hlutur í félaginu.

Samkvæmt heimildum fréttastofu stendur hins vegar ekki til að Nýi Landsbankinn verði meðeigandi í Árvakri. Bankinn mun þvi líklegast losa um hlut sinn fljótlega eftir að salan gengur í gegn.