Jón Ásgeir segir skipulagða rógsherferð standa sem hæst

Jón Ásgeir Jóhannesson kaupsýslumaður segir að skipulögð rógsherferð standi nú sem hæst gegn ákveðnum fyrirtækjum og einstaklingum í íslensku viðskiptalífi.

„Líklega er verið að reyna að beina athyglinni frá aðilum sem ættu fremur að vera í kastljósi vegna bankahrunsins. Augljóst er hvernig fórnarlömbin eru valin og ríma þau nöfn vel við óvinalista tiltekinna afla sem lengi hefur legið fyrir," segir Jón Ásgeir. Hann bendir á að slúðurblaðið New York Post birti í dag óhróður og ósannindi um sig sem ekkert eigi skylt við sannleika og góðar venjur í fréttamennsku og í engu hafi verið leitað eftir upplýsingum frá Baugi. Jón Ásgeir segist ætla að krefjast leiðréttinga í blaðinu.

„New York Post er nokkur vorkunn að hafa látið vonda heimildamenn fóðra sig með lygi og óhróðri en er engu að síður ábyrgt orða sinna," segir Jón Ásgeir.