Straumur vill rannsókn á gjaldeyrisviðskiptum sínum

Straumur-Burðarás Fjárfestingabanki hefur sent Seðlabanka Íslands og Fjármálaeftirlitinu erindi og farið þess á leit að gjaldeyrisviðskipti bankans verði tekin til sérstakrar skoðunar í ljósi umræðunnar seinustu daga.

,,Straumur hefur ávallt unnið samkvæmt gjaldeyrisreglum Seðlabanka Íslands af fullum heilindum. Við höfum engu að leyna," segir William Fall, forstjóri Straums, í tilkynningu.

Nokkur umræða hefur undanfarna daga farið fram um gjaldeyrisviðskipti bankans. ,,Hefur verið látið að því liggja að bankinn, þar með talin útibú hans erlendis, ástundi slík viðskipti, ýmist beint eða í gegnum útibúin erlendis, í andstöðu við reglur Seðlabanka Íslands um gjaldeyrismál og vinni gegn því að skilaskyldur gjaldeyrir berist til landsins. Bankinn hafi með þessu komið í veg fyrir eðlilega styrkingu krónunnar." Bankinn segir að þetta sé alrangt.

Frá því að reglur Seðlabanka Íslands um gjaldeyrismál tóku gildi hefur Straumur keypt erlendan gjaldeyri fyrir fjárhæð sem samsvarar um það bil 4,5 milljörðum króna, segir í tilkynningunni. ,,Á sama tímabili hefur bankinn á grundvelli reglna Seðlabankans selt gjaldeyri fyrir fjárhæð sem samsvarar um það bil 2,6 milljörðum króna. Af þessu má ráða að gjaldeyrisvelta Straums er mjög óveruleg þegar hún er borin saman við heildar vöruútflutning þjóðarbúsins, en sem dæmi má nefna að samkvæmt opinberum tölum námu þær um það bil 97,2 milljörðum króna í nóvember og desember síðasta árs. Ásakanir um að Straumur standi því í vegi að krónan styrkist fá því ekki staðist."