Mario Balotelli sagður vera undir smásjá Arsenal

Samkvæmt heimildum breska götublaðsins The Sun er knattspyrnustjórinn Arsene Wenger hjá Arsenal sagður vera mikill aðdáandi framherjans efnilega Mario Balotelli hjá Inter og njósnarar frá Arsenal eru sagðir hafa verið tíðir gestir á leikjum Ítalíumeistaranna undanfarið.

Hinn 19 ára gamli Balotelli hefur verið að fá stærra hlutverk hjá Inter á þessu tímabili en er þó enn fyrir aftan Samuel Eto'o og Diego Milito í goggunarröðinni en hann hefur skorað 12 mörk í 40 leikjum á ferli sínum með ítalska félaginu til þessa.

Balotelli á að baki landsleiki með U-21 árs landsliði Ítalíu og fastlega er búist við því að hann taki fljótlega stökkið upp í a-landsliðið.