Skortsala bréfa enn bönnuð

Framlengt hefur verið út þennan mánuð bann við skortsölu hlutabréfa ákveðinna fyrirtækja sem hér eru skráð í kauphöll. Fjármálaeftirlitið hefur tilkynnt NASDAQ OMX Iceland (Kauphöllinni) um þetta, en banninu var komið á í októberbyrjun eftir fall bankanna og gilti til 16. þessa mánaðar.

„Um er að ræða áframhaldandi takmörkun á skortsölu fjármálagerninga útgefnum af tilgreindum fyrirtækjum í samræmi við fyrri tilkynningu. Takmörkunin gildir til og með 31. janúar næstkomandi," segir í tilkynningu til Kauphallar.

Samkvæmt banninu er óheimilt að skortselja bréf Glitnis, Kaupþings, Landsbankans, Straums-Burðaráss, Spron og Existu, sem hér hafa verið tekin til viðskipta í kauphöll, nema seljandi hafi bréfin í sinni vörslu þegar sölutilboð er lagt fram og tilkynni viðskiptin án tafar til Fjármálaeftirlitsins.

- óká