Gogoyoko springur út

„Við höfum möguleika á því að springa út og vantar mikið af starfsfólki," segir Haukur Davíð Magnússon, framkvæmdastjóri og einn stofnenda Gogoyoko.

Gogoyoko er samfélagsvefur ætlaður tónlistarfólki, útgáfum og tónlistarunnendum. Tíu prósent allrar veltu af sölu á vefnum renna til góðgerðarmála. Beta-útgáfa vefjarins fór í loftið í síðustu viku en stefnt er að því að opna allar gáttir hans í apríl.

Fyrirtækið auglýsir eftir sjö nýjum starfsmönnum hið minnsta með þekkingu á ýmsum kimum vefmála og markaðssetningar, auk lærlinga og sendiherra víða um heim. „Draumastaðan er að sjá sendiherra Gogoyoko í stærstu borgum Norðurlanda og í Bandaríkjunum," segir Haukur.

Starfsmenn eru 26 talsins; tíu eru hér, jafn margir starfa við hugbúnaðargerð á Indlandi og tveir í Þýskalandi.

Haukur segir fjölda hæfileikaríkra einstaklinga hafa komið á vinnumarkað eftir bankahrunið hér í október í fyrra. Það hafi gert fyrirtækinu kleift að draga úr starfseminni ytra og leita eftir íslensku starfsfólki. - jab