Ómar ráðinn framkvæmdastjóri hjá SmartLynx

Ómar Benediktsson hefur verið ráðinn framkvæmdastjóri flugfélagsins SmartLynx í Lettlandi, dótturfélags Icelandair Group.

Hann mun taka við starfinu af Eugene O'Reilly sem gegnt hefur því tímabundið. O'Reilly mun líkt og fyrirhugað var hverfa til aftur til starfa sem aðstoðarframkvæmdastjóri Icelease, en mun jafntframt taka sæti í stjórn SmartLynx.

SmartLynx er leiguflugfélag með starfsemi víða um heim, en höfuðstöðvar í Riga í Lettlandi.

Í tilkynningu um málið segir að Ómar búi yfir mikilli reynslu af flugrekstri, m.a. sem forstjóri og einn aðaleigenda Íslandsflugs, og síðar Air Atlanta. Hann hefur undanfarin ár gegnt varaformennsku í stjórn Icelandair Group, en mun hverfa úr stjórninni á aðalfundi félagsins í mars.