Lán SÍ til íslensku bankanna tvöfölduðust árið fyrir hrun

Útistandandi lán seðlabankans til íslenskra banka meira en tvöfölduðust á árinu fyrir hrun. Í reikningum bankans sést að frá því í júlí 2007 til september 2008 hækkuðu lán til innlánsstofnana úr tæpum 158 milljörðum í tæpa 455 milljarða. Í júlí, ágúst og september 2008 voru útlán seðlabankans til íslensku bankanna tvöfalt hærri en í sömu mánuðum árið áður.

Fréttastofa spurði Seðlabankann hvort hægt væri að fá yfirlit yfir lán bankans undanfarið ár, einkum til íslensku bankanna. Þau svör fengust að hagfræðisvið bankans hefði ekki fengið skýrslur lengra fram í tímann en september 2008, en myndi athuga hvort frekari tölur lægju fyrir.

Þá spurði fréttastofa einnig hver útgjöld seðlabankans hefðu verið undanfarið til að hafa áhrif á gengi krónunnar, og verður þeirri fyrirspurn ekki svarað. Einnig er beðið eftir svari við því hversu mikið hefur gengið á fyrsta áfanga láns Alþjóðagjaldeyrissjóðsins síðan Íslandi var veitt það í nóvember á síðasta ári.

Yfirlit yfir upphæð útistandandi lána Seðlabankans fram í september 2008 má nálgast hér að neðan.