Veltumesti mánuðurinn í kauphöllinni með skuldabréf

Heildarviðskipti með hlutabréf námu 3,0 milljörðum kr. eða 149 milljónum kr. á dag að meðaltali í janúar. Þetta kemur fram í yfirliti frá kauphöllinni. Þar segir að janúar hafi verið veltumesti mánuðurinn í kauphöllinni hvað skuldabréf varðar frá bankahruninu í október.

Markaðsvirði skráðra fyrirtækja var 207 milljarðar kr. í lok janúar. Mest viðskipti voru með Marel í síðastliðnum mánuði eða rúmir 1,1 milljarðar kr. í 179 viðskiptum. Næst á eftir var Straumur-Burðarás með rúmar 960 milljónir kr. í 779 viðskiptum og síðan námu viðskipti með Össur rúmum 800 milljónum kr. í 163 viðskiptum.

Viðskipti með þessu þrjú félög námu rétt um 89% af heildarviðskiptum á Aðalmarkaði kauphallarinnar.

Saga Capital var með mestu hlutdeild kauphallaraðila á hlutabréfamarkaði í janúar eða 24,7%. Næst komu Nýi Kaupþing banki 16,9%, Nýi Glitnir banki 16,7% og NBI 15%.

Viðskipti á First North Iceland námu 177 milljónum kr. og nemur markaðsvirði fyrirtækjanna þriggja 20,3 milljónum kr. í lok janúarmánaðar.

Nýi Glitnir banki var með mestu hlutdeild kauphallaraðila á skuldabréfamarkaðnum 22,1%. Næstir komu Straumur-Burðarás 21,8%, MP Banki 18,4% og Nýi Kaupþing banki 15,3%.