Eignir ýmissa lánafyrirtækja lækkuðu um 2,5 milljarða í maí

Eignir ýmissa lánafyrirtækja námu 1.263,7 milljörðum kr. í lok maí og lækkuðu um 2,5 milljarða kr. í mánuðinum. Þetta kemur fram í hagtölum Seðlabankans.

Útlán og eignarleigusamningar námu 1.108,7 milljörðum kr. í lok mánaðarins og lækkuðu um 2,0 milljarða kr. frá fyrra mánuði, samanborið við hækkun mánuðinn áður upp á 11,3 milljarða kr.

Innstæður í Seðlabankanum jukust um tæpa 13,0 milljarða kr. milli mánaða, fóru úr 3,4 milljörðum kr. í 16,4 milljarða kr. en kröfur á lánastofnanir lækkuðu um 13,4 milljarða kr.

Eigið fé nam 70,5 milljarði kr. í lok maí og hækkaði um 9,9 milljarða kr. milli mánaða.

Til ýmissa lánafyrirtækja teljast Íbúðalánasjóður, fjárfestingarbankar, eignarleigur, greiðslukortafyrirtæki og fjárfestingarlánasjóðir.