Trezeguet bjargaði stigi fyrir Juventus í kvöld

Franski framherjinn David Trezeguet tryggði Juventus 2-2 jafntefli á móti Genoa í ítölsku deildinni í kvöld en stigið nægði Juve til að komast upp að hlið Inter í toppsæti deildarinnar.

Trezeguet skoraði markið mikilvæga með skalla fjórum mínútum fyrir leikslok. Juventus var búið að vinna fyrstu fjóra leiki sína á tímabilinu en Inter fór á toppinn með 3-1 sigri á Napoli á miðvikudagskvöldið.

„Þetta var frábær leikur. Við náðum ekki að vinna leikinn en þetta eru samt ágæt úrslit því það er mjög erfitt að vinna á útivelli á móti Genoa," sagði Trezeguet eftir leikinn.

Vincenzo Iaquinta kom Juventus í 1-0 eftir aðeins sex mínútur en Giandomenico Mesto jafnaði og Argentínumaðurinn Hernan Crespo kom síðan inn á sem varamaður og Kom Genoa í 2-1 á 74. mínútu leiksins.