Nokkuð fæst upp í kröfur hjá Kaupþingi

Skilanefnd Kaupþings hefur birt mat á eignum bankans. Matið er framkvæmt af nefndinni og sérfræðingum innan bankans sem hafa þekkingu á eignunum. Niðurstaðan er sú að eignirnar eru metnar á ríflega 618 milljarða kr. og eru að mestu lán til viðskiptavina að fjárhæð 250 milljarða kr.

Greining Glitnis fjallar um málið í Morgunkorni sínu. Fram kemur að þar næst kemur skuldabréf nýja Kaupþings að fjárhæð 170 milljarða kr. og lán til lánastofnanna að fjárhæð 100 milljarðar kr.

Matið tekur ekki tillit til liða sem gætu leitt til skuldajöfnunar en áætlað er að þeir séu á bilinu 200-400 milljarðar kr.

Á móti eignum eru skuldir félagsins tæplega 2.432 milljarðar kr. Samkvæmt matinu má ætla að nokkuð fáist upp í kröfur, segir í Morgunkorninu.