Íslenskt vinnuafl orðið með því ódýrasta í V-Evrópu

Raungengi íslensku krónunnar er nú afar lágt, hvort sem miðað er við verðlag eða launakostnað. Hefur hlutfallslegur launakostnaður fallið enn hraðar en verðlag undanfarið og má segja að íslenskt vinnuafl sé orðið með því ódýrasta í Vestur-Evrópu í kjölfar gengishruns krónu á síðasta ári.

Greining Glitnis fjallar um málið í Morgunkorni sínu en Seðlabankinn birti í gær nýjan útreikning á raungengi krónunnar. Bankinn reiknar raungengið með mánaðartíðni miðað við hlutfallslegt verðlag, en á ársfjórðungstíðni miðað við hlutfallslegan launakostnað.

Miðað við mánaðargögnin hækkaði raungengi, mælt á kvarða verðlags, um hálft annað stig í janúar, fyrst og fremst vegna meiri verðbólgu hér á landi en í helstu viðskiptalöndum. Raungengið er þó enn 27% undir langtímameðaltali á þennan kvarða.

Þannig var raungengi, mælt á kvarða verðlags, tæp 30% undir meðaltali undanfarinna tólf ára, en raungengið miðað við launakostnað var hins vegar ríflega 36% undir meðaltali á sama tíma.