HS Orka skilaði 612 milljóna hagnaði fyrrihluta ársins

Heildarafkoman hjá HS Orku á fyrstu sex mánuðum ársins var jákvæð um 611,6 milljónir kr. Eiginfjárhlutfall hækkaði úr 16,3% í 18,3%.

Í tilkynningu segir að hagnaður félagsins á tímabilinu nam 184 milljónir kr., en var á sama tímabili árið áður 979 milljónir kr. Þegar tekið er tillit til tekna og gjalda sem færð eru á eigið fé er heildarhagnaður tímabilsins 612 millj. kr. samanborið við 8,6 milljarða kr. á sama tímabili árið áður.

Lækkun heildarhagnaðar skýrist af því að á árinu 2008 voru rekstrarfjármunir félagsins endurmetnir til gangvirðis til samræmis við heimildir.

Hitaveitu Suðurnesja hf. var á árinu 2008 skipt í tvö félög HS Orku hf. og HS Veitur hf. sem tók yfir einkaleyfisstarfsemi Hitaveitu Suðurnesja hf. Starfsemi sem nú tilheyrir HS Veitum hf. er sett fram sem aflögð starfsemi í samanburðarfjárhæðum í árshlutareikningi félagsins.Árshlutareikningurinn sýnir fyrsta rekstrartímabil HS Orku hf. í núverandi mynd.

Samkvæmt rekstrarreikningi námu rekstrartekjur HS Orku hf. á tímabilinu tæpum 2,9 milljörðum kr., en voru tæpir 2,7 milljarðar kr. á sama tímabili árið áður. Hækkun rekstrartekna nemur 7% eða 195 milljónum kr. Hækkun tekna er að mestum hluta vegna þjónustutekna vegna veittrar þjónustu til HS Veitna hf., en félögin hafa gert þjónustusamning sín á milli þar að lútandi.

Samkvæmt efnahagsreikningi eru eignir HS Orku hf. þann 30. júní 2009 bókfærðar á 35,7 milljarðar kr. Eignir lækkuðu um 764 milljónir kr. frá ársbyrjun.

Skuldir HS Orku hf. nema 29,2 milljörðum kr. samkvæmt efnahagsreikningi, þar af eru skammtímaskuldir 5,8 milljarðar kr.