Bankastjóri Englandsbanka ósáttur við útlánatregðu

Bankastjóri Englandsbanka segist deila gremju fyrirtækja sem viðskiptabankar haldi í gíslingu með tregðu sinni til útlána.

Það er víðar en í Bretlandi sem kvartað er yfir tregðu banka til að lána peninga þrátt fyrir milljarða framlög stjórnvalda til þess að örva viðskipti og atvinnulíf.

Bankarnir liggja á aurum sínum eins og ormar á gulli. Þeir hafa lokað lánalínum til fjölda fyrirtækja sem berjast fyrir lífi sínu.

Mervyn King seðlabankastjóri Bretlands sagði í gær að hann skildi vel og deildi gremju fyrirtækjanna.

King hefur áður sagt við þingmenn að það sé lífsnauðsynlegt að bankarnir auki útlán sín til þess að koma í veg fyrir að landið sökkvi dýpra og dýpra í langvarandi kreppu.

Hann hefur einnig gagnrýnt banka fyrir óhóflegar bónusgreiðslur sem leiði menn út í að taka of mikla áhættu.