Eignir Stoða hafa lækkað um 200 milljarða kr.

Eignir Stoða hafa nú lækkað um u.þ.b. 200 milljarða kr. síðastliðið hálft ár. Miðað við bráðabirgðamat á verðmæti eigna félagsins um sl. áramót er eigið fé Stoða neikvætt um 111 milljarða króna og því ljóst að gjaldþrot blasir við félaginu ef ekkert er aðhafst.

Þetta kemur fram í tilkynningu sem Stoðir sendu frá sér í eftir að greiðslustöðvun félagsins var framlengd í gærdag. Þar er einnig greint frá fundi sem haldinn var með lánadrottnum þann 16. janúar s.l.

Á fundinum lýstu stjórnendur Stoða þeirri skoðun sinni að gjaldþrot þjónaði ekki hagsmunum lánardrottna. Við gjaldþrot Stoða myndi rekstur félaga í eigu Stoða komast í uppnám og lægra verð myndi fást fyrir eignir félagsins.

Stjórnendur Stoða hafa kynnt lánardrottnum drög að áætlun um endurskipulagningu fjárhags og reksturs Stoða. Áætlunin miðast við að hlutafé núverandi hluthafa verði afskrifað að öllu leyti og lánardrottnar breyti hluta skulda í hlutafé. Framlenging greiðslustöðvunarinnar gefur stjórnendum Stoða svigrúm til að vinna frekar að endurskipulagningu félagsins í nánu samstarfi við lánardrottna.

Stjórnendur Stoða hafa átt fjölda funda með lánardrottnum en það hefur torveldað framgang að margir lánardrottnanna eru sjálfir í greiðslustöðvun eða gjaldþrotameðferð.

Á undanförnum mánuðum hefur starfssemi Stoða verið takmörkuð, skrifstofu í London lokað og öllu starfsfólki sagt upp störfum. Síðustu vikur hafa 8 starfsmenn á uppsagnarfresti verið að störfum fyrir félagið.