Zarate búinn að semja við Lazio

Eftir því sem umboðsmaður Argentínumannsins Mauro Zarate segir hefur hann náð samkomulagi við Lazio um að gera fimm ára samning við félagið.

Zarate er nú í láni hjá Lazio frá Al Sadd í Katar og skorað átta mörk í 21 leik fyrir félagið í ítölsku úrvalsdeildinni á tímabilinu.

„Þetta er rétt. Við höfum náð samkomulagi við forseta Lazio um næstu fimm árin en það vantar aðeins fáein smáatriði upp á," sagði umboðsmaðurinn Sergio Zarate við ítalska fjölmiðla en hann er bróðir Mauro.

„Það er hins vegar undir Lazio komið að ná samkomulagi um kaupverð við Al Sadd."

Claudio Lotito, forseti Lazio, segir að aðeins vanti undirskrift Zarate á samninginn og þá sé allt klárt.