Slysalegt mark Balotelli tryggði Inter tólf stiga forskot

Inter Milan náði í dag tólf stiga forystu í ítölsku A-deildinni þegar heppnismark varamannsins Mario Balotelli tryggði liðinu 2-1 sigur á Bologna á útivelli.

Esteban Cambiasso kom Inter yfir á 57. mínútu leiksins eftir skalla frá Adriano, en Úrúgvæmaðurinn Miguel Britos jafnaði fyrir Bologna á 78. mínútu. Bologna er þjálfað af Sinisa Mihajlovic, fyrrum leikmanni og aðstoðarþjálfara Inter.

Eins og svo oft áður var það hinsvegar Inter sem hafði heppnina með sér og á 82. mínútu átti varamaðurinn Balotelli aukaspyrnu að marki Bologna sem sveif yfir allt og alla í teignum og hafnaði í netinu.

Roma vann Siena 1-0 með marki Rodrigo Taddei um miðbik síðari hálfleiks.

Síðar í kvöld mætast Palermo og Juventus.

Staðan í ítölsku A-deildinni