Kaupmáttur lækkaði um 8,2% á einu ári

Kaupmáttur lækkaði um 0,9% í desember og hefur lækkað um 8,2% síðustu tólf mánuði. Launavísitala lækkaði um 0,7% í desember en hún hefur hækkað um 8,3%. Þetta kemur fram í tölum frá Hagstofunni.

Samkvæmt kjarasamningum Launanefndar sveitarfélaga og helstu viðsemjenda, sem undirritaðir voru á tímabilinu frá miðjum nóvember fram í byrjun desember, hækkuðu laun félagsmanna um 20.300 krónur frá 1. nóvember 2008. Sambærilegir samningar voru undirritaðir á milli annarra viðsemjenda á vettvangi sveitarstjórnarstigsins.

Samkvæmt kjarasamningi Samtaka starfsmanna fjármálafyrirtækja og Samtaka atvinnulífsins sem undirritaður var þann 5. desember síðastliðinn hækkuðu laun félagsmanna um 20.500 krónur frá 1. nóvember 2008. Mánaðarlaun yfir 450.000 krónum tóku ekki breytingum samkvæmt þessu ákvæði samningsins.