Minni umferð en aðrar helgar

Umferð úr höfuðborginni var minni um verslunarmannahelgina en flestar aðrar helgar í sumar, samkvæmt tölum frá Vegagerðinni. Vegagerðin hefur tekið saman tölur um umferð frá höfuðborgarsvæðinu frá því síðustu helgina í júní, og var umferð um verslunarmannahelgina minni en um meðalhelgi. Umferðin var mest síðustu helgina í júní, en minnst síðustu helgina í júlí.

„Mýtan um verslunarmannahelgina virðist ekki standast. Hún virðist ekki vera stærsta ferðahelgin ef marka má þessar tölur," segir Friðleifur Ingi Brynjarsson, verkefnastjóri hjá Vegagerðinni. Það sé í það minnsta tilfellið í ár frá höfuðborgarsvæðinu. Svo geti þetta verið misjafnt úti á landi.

Umferðin var mæld á fimm stöðum nálægt höfuð-borgarsvæðinu. Til austurs var mælt á þremur stöðum, alls staðar var töluvert meiri umferð en um sömu helgi í fyrra. Undir Ingólfsfjalli jókst umferðin um tæp tíu prósent milli ára, um Hellisheiði um rúm ellefu prósent og um Sandskeið um tæp sjö prósent. Til norðurs var mælt á tveimur stöðum og var umferðin nokkru minni á þeim báðum en á sama tíma í fyrra. Mælt var á Árvöllum á Kjalarnesi, þar sem umferðin var rúmum sex prósentum minni, og um Hvalfjarðargöng, þar sem umferðin minnkaði um níu prósent milli ára. - þeb