Össur hf. hagnaðist um rúma 3 milljarða kr í fyrra

Hagnaður Össurar hf. á síðasta ári nam 28,5 milljónum dollara eða rúmlega 3 milljörðum kr. samanborið við 7,6 milljónir dollara á sama tímabili árið 2007. Verður að telja þetta mjög góðan árangur.

Jón Sigurðsson, forstjóri Össurar segir að árið hafi einkennst af áherslum á innviði fyrirtækisins. Eitt af helstu verkefnum ársins var að auka arðsemi ...."og á sama tíma og við höfum séð minni sölu en gert var ráð fyrir, jókst arðsemin töluvert."

Á árinu voru þrettán nýjar vörur kynntar á markaðnum og tuttugu teknar af markaði. Á árinu 2009 eru væntanlegar nýjar vörur, en aðal áherslan mun vera á hefðbundnar vörur sem falla að núverandi endurgreiðslukerfum.

„Fjármálakreppan sem nú ríkir í heiminum hefur haft takmörkuð áhrif á starfsemi félagsins, en það á einnig almennt við um heilbrigðisgeirann. Þegar á heildina er litið teljum við að okkur hafi tekist að byggja upp sterkt fyrirtæki og að leggja góðan grunn að áframhaldandi velgengni." segir Jón Sigurðsson.