Óvíst hvort stjórnvöld nái að uppfylla kröfur AGS í tíma

Alls óvíst er hvort íslensk stjórnvöld nái að uppfylla þær kröfur Alþjóðagjaldeyrissjóðsins (AGS) sem eiga að vera komnar til framkvæmda í næsta mánuði. Þá fer fram fyrsta endurskoðun AGS en hún er grundvöllur fyrir áframhaldandi aðstoð sjóðsins.

Greining Glitnis fjallar um málið í Morgunkorni sínu. Þar segir að Alþjóðagjaldeyrissjóðurinn setur þau skilyrði að endurfjármögnun bankanna eigi að vera að fullu lokið, en í því felst að búið verði að meta allar skuldir og eignir bankanna og setja saman nýjan efnahagsreikning nýju bankanna.

Einnig skuli mati á orsökum og afleiðingum bankahrunsins, sem unnið er af hlutlausri nefnd, vera lokið og skýrsla um helstu niðurstöður matsins vera komin til stjórnvalda og almennings.

Auk þessarar endurskoðunar á FME að vera búið að fara yfir fimm ára viðskiptaáætlanir nýju bankanna og samþykkja þær. Óljóst er á þessari stundu hvort þessari vinnu verður lokið á tilsettum tíma í febrúar.

Eins og kunnugt er var lánveiting AGS upp á 2,1 milljarða dollara ýmsum skilyrðum háð. Skömmu eftir að lánveitingin var samþykkt í nóvember var fyrsti hluti lánsins greiddur út, alls 827 milljónir dollara.

Afgangur lánsins skal svo greiddur út í átta jöfnum greiðslum sem hver um sig nemur 155 milljónum dollar. Greiðslurnar koma í kjölfar ársfjórðungslegrar endurskoðunar Alþjóðagjaldeyrissjóðsins þar sem m.a. verður metið hvernig gengur að framfylgja efnahagsáætlun þeirri sem stjórnvöld unnu að í samstarfi við sjóðinn og hvernig hafi tekist til að framfylgja áætluninni.